Panton Aceh - Aceh nyoe kaya

Aceh Noyoe Kaya Raya


Azier Nanggroe, 30/11
Aceh nyoe kaya wahe syedara
Ureung ibadah pujoe Rabbana
Limong boh watee wajeb tapeuglah
Poma ngon ayah sabee meudoa

Neubri nanggroe nyoe beu teutap ceudah
Makmu beubagah rakyat ubena
Bek na lee karu deungon musibah
Bek udeep gundah kawom sidumna

Gampong ngon Kuta bek na lee Bala
Nanggroe meutuah bek prang syedara
Bak meu politik bek sagai salah
Mangat beu bagah Aceh nyoe jaya

Beuneupeu wujud wahe Ya Allah
Seuramoe Mekkah beu aman teuka
Awai kon jaya aceh meutuwah
Junoe beu bagah tapuwoe sigra

Ureung Aceh nyoe sangatlah susah
Seudeh that leupah watee takira
Di dalam gampong nyan pih le parah
Hadir beu bagah peumimpin yang meutuah

Ladom kawom ma udeep lam payah
Lakoe meutuah jinoe han lee na
Konflik seunjata rakyat le punah
Aneuk meupisah ngon ureung tuha

Dum aneuk yatim rata daerah
Gasien ngon susah lam ro ie mata
Udeep meupayeh saket meutamah
Ie mata darah cobaan teuka

Allahu Rabbi Nyang Maha Gagah
Bek lee musibah u Aceh Raya
Sinoe ngon sideh bek lee ro darah
Bek lee lam gundah ngon haro-hara

Neubri kamoe nyoe udeep beugagah
Akai beuceudah agam ngon dara
Cit Tuhan sidroe nyang kamoe seumbah
Nyang ridha Allah sabee keurija

Ban saboh Aceh beu sapeu peugah
Deuk ngon grah sama tarasa
Bahgia udeb keunan ta langkah
Pujoe Potallah bek sagai lupa

Aceh nyoe harom Seuramoe Mekkah
Nanggroe meutuah Tuhan karonya
Laot ngon darat kaya sileupah
Rahmat Potallah han soe ek kira


Sumber : http://www.azieratjeh.blogspot.com